"രാഘവോ, എന്താ പകലിരുന്നു സ്വപ്നം കാണുവാണോ?”
“സ്വപ്നത്തിന്റെ കാര്യം പറഞ്ഞപ്പൊഴാ ഓർത്തതു ശേഖരാ, ഞാൻ ഇന്നലെ സ്വപ്നത്തെക്കുറിച്ചുള്ള ഒരു സിനിമ കണ്ടു. അതിലൊരു വലിയ സന്ദേശമുണ്ട്.. ‘Your small life is someone's big dream!‘"
“കൊള്ളാമല്ലോ.. എന്താ സംഭവം?”
“നീ സ്വപ്നം കാണാറുണ്ടോ?”
“ഉവ്വ്.. ദിവാസ്വപ്നവും രാത്രിസ്വപ്നവും കാണാറുണ്ട്. ഉറങ്ങുമ്പോൾ കാണുന്ന സ്വപ്നങ്ങൾ പലപ്പോഴും ഉണരുമ്പോഴേക്കും മറന്നുപോകും.. ദിവാ‍സ്വപ്നമാണ് എനിക്കിഷ്ടം.. നമ്മുടെ ഇഷ്ടാനുസരണം ആക്കാം..”
“ പണ്ടൊക്കെ ഞാൻ കണ്ടിരുന്ന സ്വപ്നം വളർന്നു വലുതായി വലിയ ഉദ്യോഗമൊക്കെ കിട്ടി സുഖമായി ജീവിക്കുന്നതിനെക്കുറിച്ചായിരുന്നു.. എന്നാൽ ഇന്ന് നേരെ തിരിച്ചായി! ഒരു ചെറിയ കുട്ടിയായി ഓലപ്പന്തും കുട്ടിയും കൂന്നും ഒക്കെ കളിച്ചു നടക്കുന്നതാണെന്റെ ഇന്നത്തെ സ്വപ്നം..”
“അതുപറഞ്ഞപ്പൊഴാ.. ഇന്നലെ എനിക്കു സ്വപ്നം കണ്ട ഒരുത്തന്റെ വക നെഞ്ചത്തൊരു ചവിട്ടു കിട്ടി.. എന്റെ കൊച്ചുമോന്റെ! രാവിലെ ചോദിച്ചപ്പോൾ അവൻ പറയുവാ, ‘അപ്പൂപ്പൻ എന്തിനാ ഈ ഹൾക്കും സ്പൈഡർമാനും തമ്മിൽ ഇടികൂടുന്നതിനിടയ്ക്കു കയറിയതെന്ന്’.. എന്തോ പറയും! ഇന്നത്തെ പിള്ളാരുടെ സ്വപ്നങ്ങൾ പോലും വ്യത്യസ്തമാണ്..”
“ഈ സിനിമയിലെ നായകൻ ഒരു സെലിബ്രിറ്റിയാണ്. ഒരു നടൻ. മാതാപിതാക്കൾ കുഞ്ഞുന്നാളിലേ മരിച്ചു. ധാരാളം സ്വത്ത്. പക്ഷേ അയാൾക്ക് തന്റെ ജീവിതത്തോട് ഒരു മടുപ്പാണ്. എവിടെ ചെന്നാലും ആളുകൾ.. ഫോട്ടോ എടുപ്പും ബഹളങ്ങളും.. രാത്രിയിൽ കിടന്നാലോ, ഉറക്കവുമില്ല! അങ്ങനെയിരിക്കെ ഒരാൾ ഒരു മരുന്നു നിർദ്ദേശിക്കുന്നു. ലൂസിയ!! അതുകഴിച്ചാൽ നന്നായി ഉറങ്ങും.. പക്ഷേ ഒരു കുഴപ്പമുണ്ട്. സ്വപ്നം കാണും. നമുക്ക് ആരായിത്തീരാനാണ് ആഗ്രഹം, അയാളായി സ്വപ്നത്തിൽ ജീവിക്കാം..”
“കൊള്ളാമല്ലോ മരുന്ന്..”
“അങ്ങനെ നമ്മുടെ നായകൻ ആ മരുന്നു കഴിക്കുന്നു. ഒരു തീയേറ്ററിൽ സീറ്റ് നമ്പർ കാണിച്ചുകൊടുക്കുന്ന ഒരു സാധാരണക്കാരനായി സ്വപ്നത്തിൽ ജീവിക്കുന്നു. തനിക്കു യഥാർത്ഥ ജീവിതത്തിൽ സാധിക്കാത്തതെല്ലാം അയാൾ സ്വപ്നത്തിൽ സാധിക്കുന്നു. സ്വപ്നത്തിലെ അയാളെ ആരും തിരിച്ചറിയില്ല.. സാധാരണക്കാരിൽ സാധാരണക്കാ‍രൻ. തട്ടുകടയിൽ ഇരുന്നു ദോശതിന്നാം.. സൈക്കിളിൽ കറങ്ങാം.. ഒരു സാധാരണക്കാരിയെ പ്രേമിക്കാം.. ജീവിതം ആസ്വദിക്കാം..”
“കഥ കൊള്ളാം.. ഇതിൽ എന്താണു സസ്പെൻസ്?”
“ഇതിൽ ഏതാണു ജീവിതം ഏതാണു സ്വപ്നം എന്ന് അവസാനം വരെ നമുക്കു മനസ്സിലാവില്ല എന്നതാണിതിലെ രസം. സ്വപ്നവും യാഥാർത്ഥ്യവും ഇടകലർത്തി കഥ മുന്നോട്ടു കൊണ്ടുപോകുന്നു.”
“ശരിയാണ്.. ചിന്തിച്ചാൽ ഈ ജീവിതം വളരെ വിചിത്രമാണ്. ഒരു സെലിബ്രിറ്റി, തട്ടുകടയിൽ നിന്നും ചൂടോടെ ഒരു ദോശ തിന്നാൻ കൊതിക്കുമ്പോൾ എന്നും തട്ടുകടയിൽ നിന്നു വെട്ടുന്നവനു ഫൈവ് സ്റ്റാർ ഹോട്ടലിന്റെ ലോഞ്ചിലിരുന്നു ജ്യൂസു കുടിക്കാൻ മോഹം.. വെറുതെ ഈ മോഹങ്ങൾ എന്നറിയുമ്പോഴും വെറുതെ മോഹിക്കുവാൻ മോഹം..”
No comments:
Post a Comment